2014/06/22

If Renaud Was a Punk "If Renaud Was a Punk" (2013)

If Renaud Was a Punk, Jean François Ampo “Ogittu” (gitarra eta ahotsa), Iñaki Ospital “Pinaz” (gitarra), Denis Barett “Mr Ropow” (baxua) eta Olivier Taoumas “Berdouf” (bateria) taldekideek osatu zuten orain duela urte gutti batzu, xede argi batekin : Renaud frantses kantariaren kantuak punk estiloan ematea. 2010etik honera, ipar Euskal Herriko hainbat tokitan jo ari izan ondoren, taldeari bere lehen diskoa plazaratzeko momentua etorri zaio aurten.
Diskoak 6 kantu biltzen ditu. Renaud-en 6 kantu punk saltsan bikain ezarriak. Aitortu behar da Pariseko kantari famatuaren melodiak eta hitz zorrotzak ezin hobeki uztartzen direla punk estiloari eta musika ibilbide luzea duten IRWAP-eko kideen talentuari esker, egiazko punk disko on baten aitzinean gaudela. Abestien jatorrizko melodiak zaindu dituzte eta kantu guziak punk-rockaren erritmo bizian emanak dira. Taldekideek dioten bezala, parodiarik ez hemen, disko hau omenaldi gisa egin nahi izan dute. Baietz Renaud-k berak hau gustokoa ukan.
Fred Berruet
(Kronika hau 2013ko Entzun ! disko-liburuan argitaratua izan da)