2007/09/25

Diam's "Dans ma bulle" (2006)

Duela hiru urte kaleratu Diam’s kantari frantsesaren bigarren lana azken urteetako gauza baikorrenen artean koka dezakegu. Brut de femme manifesto pertsonala, politikoa eta poetikoa zen. Hitz zorrotzen mendekua arinki mintzatzen direnen aurka. Bere belaunaldiaren ikurra bilakatu den emazte baten diskoa. Lan harekin, Diam’s-ek gure belarriak eta kontzientziak zikinkeri politiko mediatikoaz behar bezala garbitu zituen. Ongi merezitako arrakasta bildu ondoren, gurekin dugu berriz, bere burbuilan sartua oraingoan. Bai, lan hau intimoagoa da, baina Diam’s-ek jarraitzen du Frantziako gazteen arazoak inork baino hobeki deskribatzen. Hitzez hitz, Mélanie-k bere errealitatea, bere jatorria, bere zauriak, bere oldartzeak eta gabeziak kantatzen ditu. Batzuetan amodioa eskas du, baina hitzak behin ere ez. Hala ere, Dans ma bulle honen soinua zertxobait garbiegia eta ezusterik gabekoa agertzen da, Big Up abestitik aitzina dantzarako eta Jackson Five entzuteko gogoa pizten baldin bazaigu ere. Abesti pare bat geroago, “hemen nago berriro“ abisatzen gaitu. Azkenean! Zure beha ginen...

Kronika entzun.com webgunean