H-Burns "Night moves" (2015)

H-Burns, Renaud Brustlein frantses gitarra-joile eta kantariaren bakarkako proiektua da. 2013an Steve Albinik ekoiztu Off the map izeneko diskoa atera ondoan, hemen dugu Drome departamendu aldeko artistaren 5. diskoa. Lan berri hau folkaren inguruan egina da. Oraingoan, gizonak mendebaldeko amerikar kostaldera eramaten gaitu, gutti edo aski elektrifikaturiko folk gitarrak, ahos lodiak eta guzi.  Rob Schnapf ekoizlearen eraginez seguraski, lehen baino gitarra idor gehiago aurkitzen ditugu hemen, bai eta teklatu eta koru frango ere.

Disko hau entzutean, anitz dira gogora heldu zazikigun erreferentziak : Elliot Smith, Johnny Cash , Bruce Springsteen... Bainan frantses honek bere unibertso pertsonala baduela ezin da ukatu. Diskoaren azala ere aipagarria da : Los Angeles-eko palmondo batzu ageri dira haizeak zafratuak, gris kolore nabarmen batekin. Disko honen giro alai eta denbora berean tristearen ilustrazio perfektua.

Fred Berruet

(Kronika hau 2015eko Entzun ! disko-liburuan argitaratua izan da)

♪♫ Kronika "Hitz eta Putz" saioan (Euskal Irratiak) - 2015-06-18 ♫♪